كشفت الفنانة رشا العدل عن آخر تطورات الحالة الصحية للفنان محمد مزربان، بعد تعرضه لحادث مروع على الطريق مساء أمس، مشيرة إلى تدهور وضعه الصحي ومطالبه الجمهور بالدعاء له.
ونشرت رشا العدل، صورة لها برفقة محمد مزربان، عبر حسابها الرسمي بموقع التواصل الاتجتماعي "فيس بوك"، وكتبت، معلقة: "محمد مزربان، بعيدًا عن إنه زميل في المجال وبعيدًا عن إنه رفيق كريق في هواية الموتوسيكلات أكتر من 12 سنة وبعيدًا غنه جمعنا جروب واحد في جروبات مختلفة سنين".
واستكملت: "ميرزو اخويا مش بس صديقي بموت في مراته ناتو، قد إيه ست جميلة وكلاس ودمها خفيف، قد أيه هو نفسه خلوق وجدع وخدوم وصاحب صاحبه، راجل فى المواقف ومستمع جيد، بينا عيش وملح ومواقف كتير ضحك وزعل وسفر كتير فى محافظات مصر من غردقة لشرم لبورسعيد للإسماعيلية للأسكندرية إلخ، مش من الناس اللى بنتقابل هاي و باي و دمتم".
وتابعت: " حادثة مرزبان هزتني بس هزت ناس كتير قوي كمان معايا سواء فنانين، بايكرز أو ناس اتعاملت معاه أو حتى ناس ماتعرفوش غير من شاشة التلفزيون، مرزبان حالته حرجة جدًا ومحتاج كل دعوة صادقة والبوست ده هدفه جمع أكبر عدد من الناس تدعيله فبترجاكم لا تبخلوا عليه بالدعاء، اللهم اشفيه شفاء لا يغادر سقما وعافيه و قومه بالسلامة لكل أحبابه وصبر وطبطب على قلب زوجته و بناته و قلبنا كلنا اللى موجوع عليه".
كيف تحولت الدراجات النارية إلى شغف عمر في حياة محمد مرزبان؟
وعلى جانب آخر، كشف محمد مزربان في إحدى اللقاءات التليفزيونية له، عن ارتباطه الشديد بالدرجات النارية، معلقًا: "انا بركب موتوسيكل من زمان، لكن اهلي كانوا بيخافوا عليا بسبب الحوادث".
واستكمل: "بدأت أركب موتوسيكل من سنة 80، ووقتها كنت في إنجلترا، ولكن معرفتش أمتلك واحد بسبب خوف أهلي عليا من الحوادث، لكن لما رجعت مصر خدني الحنين وحبيت جروبات الموتوسيكلات".
وتابع: "ابتديت بسكوتر وبعدين جبت حاجة أحدث وفضلت اطور في الموتوسيكلات اللي بركبها، ولكن كنت بحن للموتوسيكلات القديمة، وانا من أوائل الناس اللي سافرت مسافات طويلة بالموتوسيكل".
وأضاف أن "الموتوسيكل" كان سببًا في تعلمه أشياًء كثيرة بسبب اعتماده الكلي عليه في السفر، موضحًا: "الموتوسيكل علمني حاجات مكنتش أعرفها، وكنت بسافر المنيا وبلاد كتير جوا مصر بالموتوسيكل، واشتركت كمان في حملة لتنشيط السياحة في مصر مع جروبات كبيرة".
واختتم حديثه معبرًا عن الشديد بهذه الآلة، قائلًا: "ركوب الموتوسيكلات هواية ممتعة وأنا بحبها، لما تكون بتحب حد بتهتم بيه، وأنا بهتم بالموتوسيكل بتاعي وبأدق التفاصيل، وهو المعالج النفسي ليا، بحب أركبه وأنا بسمع موسيقى، أنا سافرت النوبة وسيوة بالموتوسيكل، واكتشفت آثار في المنيا مكنتش أتخيلها بسبب سفري بالموتوسيكل، ومرة حد شافني لقيته بيقولي: "مالك ومال البهدلة دي؟".
