أكد الإعلامي أحمد شوبير: "أن ملف تجديد التعاقد مع نجله مصطفي شوبير، حارس مرمى الفريق الأول لكرة القدم بالنادي، خلال الفترة الحالية كان أسهل ملف ولكنه بقى متكهرب ومتعقرب".
وأضاف "شوبير" في تصريحاته عبر فضائية "النهار": "على مدى 3 سنوات سابقة نقول عايزين نجدد وفجأة الكلام يقف، لحد السنة دي بعد كأس العالم الكلام بقى جد جدًا جدًا في موضوع التجديد"، موضحًا: "حصل كلام واتفاقات ملهاش علاقة بالماديات، الماديات كلها على الجميع، كله زي بعضه، مفيش خلاف في الماديات، لأن الماديات على الجميع إمام عاشور وياسر إبراهيم ومروان عطية ومحمد هاني ومصطفى شوبير".
وتابع: "بطلب من النادي الأهلي أنه يحمي ولاده، التفاوض في النهاية بينتهي بنجاح، خد الكلام على مسؤوليتي، لكن اللي ممكن يسيب غصة في القلب أو ضيق أو زعل تبدأ تتسرب حاجات من الإجتماعات، كل الكلام كان عن الشرط الجزائي لكن مكنش في كلام على الفلوس خالص، لكن الناس تبدأ تقول أصل مصطفى طلب 100 مليون و70 مليون وكلام غريب".
وأردف: "رجعوا في الأخر لما الأمور اتعرفت قالوا مصطفى شوبير قال متكلمش في الماديات لكنه قال اكتبولي ما يضمن أن لو جالي عرض محترم خلال من 1 يونيو وحتى 1 أغسطس أني أمشي"، موضحًا: "مصطفى جاله عرض من كومو الإيطالي بعرض رسمي فهمي نظمي ولما اتقاله لأ قالهم خلاص الموضوع انتهى".
وأكمل: "النادي الأهلي حسم التفاوض بين وكيل مصطفى شوبير وقال مفيش شرط جزائي خالص، لأني متخيل كل ما اسمع كلمة شرط جزائي أن في كارثة وحريقة بتحصل للوي ذراع الأهلي، لكن مفيش حاجه من دي من وكيل أعمال مصطفى شوبير".
وأكد: "محاولة شيطنة اللاعبين أمر غير مستحب لأنه في النهاية دا اللاعب بتاعك وهيجدد معاك سواء بكره او بعد شهر او أسبوعين لكنهم هيجددوا في النهاية عشان بيخافوا عليه وعايزين أحسن حاجه للنادي، لكن في نفس الوقت اللاعب نفسه يحترف ومحصلش اتفاق".
واختتم: "هناك شخصية بارزة تدخلت في هذا الأمر عشان تطمين وكيل اللاعب وليس الشرط الجزائي، لأن اللاعب نفسه قال تحت أمر النادي، وقال أن القصة هتخلص بشكل معين"، مؤكدًا: "مصطفى شوبير عايز الأهلي ومتمسك بالأهلي ومغضبش على النادي ومقالش اما كومو او بلاش وعارف أن الأهلي بيته، فلازم الأهلي يحمي لاعبيه، وهناك شخصية بارزة تقوم بهذا الدور مع ياسر إبراهيم ومحمد هاني ومصطفى شوبير، وأنا على يقين أن الثلاث لاعبين هيجددوا".
ويسعى مسؤولي القلعة الحمراء لحسم تمديد عقد شوبير خاصة بعد تألقه رفقة منتخب مصر في كأس العالم، وامتلاكه عدة عروض أوروبية خلال الفترة الجارية.
