كشف زياد حجاج أبو جبل، لاعب منتخب مصر للمصارعة الحرة للشباب، تفاصيل أزمته الأخيرة ومغادرته بعثة المنتخب في سلوفاكيا عقب بطولة العالم للشباب.
ووجه "زياد" رسالة مؤثرة إلى أسرته مؤكدًا فيها اتخاذه لقرار مغادرة البعثة تحت ضغط ظروف صعبة، ورغبته في إثبات ذاته وتحقيق إنجاز يليق باسم مصر.
وقال "زياد" عبر حسابه الرسمي على موقع التواصل الاجتماعي "فيس بوك": "أنا اللاعب الدولي زياد حجاج أبو جبل، لاعب منتخب مصر للمصارعة الحرة".
وأضاف: "عايز أقول لأبويا وأمي ما تزعلوش مني، أنا عملت كده علشان أبقى في نظر نفسي راجل، ومش هرجع مصر بلدي الحبيبة إلا وأنا مشرفها"، موضحًا: "سامحوني، أنا تعبت كتير وتعبت أبويا قوي معايا، وأنا كلفته كتير، وهو معاه سبع إخوات غيري".
وتابع: "ما كانش ينفع غير إني أرجع مصر ومعايا الميدالية، وإن شاء الله هيحصل. حبيت أطمنكم عليا، إن شاء الله راجع لمصر وأنا بطل ومشرفها، بالله عليك يا حاج تسامحني وتدعيلي".
وأكمل: "أنا سفروني لوحدي من مطار القاهرة إلى سلوفاكيا وما حدش معايا من البعثه وما كانش في دماغي حاجه واتصلت بيهم وروحت على البطولة ولعبت وانا كنت مصاب في الضلع اليمين، وأصريت ألعب علشان أحقق حلمي وأجيب ميدالية لمصر".
واختتم: "أنا كل اللي باخده في الشهر 700 جنيه وأنا لاعب دولي هيعملوا ايه ولا ايه ولكن أنا المسئول عن القرار ده بعد الضغوط دي كلها ما كنش ينفع أرجع تاني أنا اتولدت مصارع وهعيش مصارع رفعت علم مصر وهيفضل مرفوع أن شاء الله سامحوني".
