كشف المطرب النوبي كرم مراد كواليس بداية رحلته مع الموسيقى مؤكداً أن خاله الموسيقار العالمي الراحل حمزة علاء الدين كان صاحب الفضل الأول في تعلقه بآلة العود ودعمه في خطواته الأولى نحو الغناء.
وأكد "مراد" في تصريحات خاصة لموقع "صوت" : "وأنا صغير كنت بشوف غطا إسطوانة عندنا في البيت فسألت مين ده؟.. قالولي ده خالك اللي عايش في أمريكا، طبعا الراحل العظيم حمزة علاء الدين، وكان ماسك العود، فحبيت العود حباً فيه لأن الصور كلها كانت بالعود" .
وأضاف أن خاله خلال إحدى زياراته إلى القاهرة لاحظ موهبته وقرر أن يسانده قائلاً: "شاف إن عندي الموهبة وأخدني من إيدي وروحنا شارع محمد علي، المكان اللي بيتباع فيه الآلات الموسيقية ودخلنا ورشة اسمها جميل جورج والمحـل للأسف قفل بعد كده".
وتابع:" قالي أنا عارف كل حفرة في الورشة، لأنه وهو صغير كان صبي فيها، وبعدها قال لي: أنت حظك حلو لقيت اللي يشتريلك العود، أنا اشتغلت بتمنه، ودي كانت أول درس اتعلمته منه".
واستكمل"مراد"حديثه قائلاً : "اشترى لي العود، وعلمني عليه أول النغمات "دو ري مي فا"، وبعدها سافر أمريكا، وكان بييجي مصر كل 3 أو 4 سنين، ولما جه بعد كده لقاني بعمل حفلات وأنا لسه صغير".
ويعد الموسيقار الراحل حمزة علاء الدين أحد أبرز رواد الموسيقى النوبية في العالم ونجح في تقديم التراث النوبي على المسارح العالمية كما كان له دور كبير في التعريف بآلة العود والموسيقى الشرقية خارج مصر.
