كشف النجم عبد الله السعيد، لاعب خط وسط نادي الزمالك، كواليس انتقاله لأكبر أندية الدوري المصري بداية من الإسماعيلي والأهلي وبيراميدز ووصولًا لتواجده داخل نادي الزمالك.
انتقال عبد الله السعيد للأهلي
وعن انتقاله للأهلي من صفوف الإسماعيلي، قال السعيد: "لما جت الخطوة بانتقالي للأهلي من الإسماعيلي كنت عارف أنه هيتم مهاجمتي بشكل كبير من الجمهور لأن حقهم يتضايقوا، بسبب أن الأهلي والإسماعيلي طول عمرهم منافسين لبعض".
وأضاف السعيد: "أهلي كمان لما عرفوا إني رايح الأهلي كانوا خايفين من الخطوة دي وحصلهم مشاكل في الإسماعيلية ساعتها"، مؤكدًا: "اللي حصل أمر طبيعي وهي دي الكورة، ومهما اتكلمت وبررت مش هغير حاجة".
وأوضح: "لما روحت الأهلي كنت مصدق نفسي وواثق إني هنجح، رغم أن كان فيه لعيبة نجوم في مكاني في الأهلي، وكمان مانويل جوزيه كان مديني ثقة وكان مُصر على التعاقد معايا"، متابعًا: "خطوة انتقالي للأهلي كنت حاسس وقتها أنها متأخرة، وفي الإسماعيلي المنافسة على البطولات وتحقيقها صعب جدًا، عشان كده كنت حاسس إن الخطوة دي هتساعدني في الوصول للمنتخب والبطولات".
انتقال عبد الله السعيد لبيراميدز
وعن انتقاله لبيراميدز من صفوف الأهلي، أوضح السعيد: "لما كنت في أهلي جدة جالي تليفون من المستشار تركي آل الشيخ عشان أنضم إلى بيراميدز ووافقت، تاني يوم كنت في مصر وكان فيه ماتش ضد الأهلي، واتعرفت على اللعيبة وإحنا في الأتوبيس رايحين الملعب، وقبل المحاضرة حسام حسن قالي هلاعبك في نص الملعب ديفيندر، وبعدها الشوط التاني لعبت صانع ألعاب وجبت جول المكسب".
سبب انتقاله إلى الزمالك
وعن انتقاله إلى الزمالك: "تعودي على الأندية الجماهيرية والحماس اللي فيها كان سبب انتقالي للزمالك، لأني كنت بلعب في بيراميدز بس كان طول الوقت حاسس إن فيه حاجة ناقصاني رغم إني كنت ماشي كويس مع الفريق".
وأوضح: "كان في مشاكل كتير في الزمالك والانتقالات مقفولة ودا اللي خلاني منضمش ليه من 3 سنين رغم إني سعيت لكده، بجانب عقدي مع بيراميدز كان لسه فيه كام سنة، وبيراميدز عايز فلوس من الزمالك عشان يمشيني وكنت عارف أن الزمالك مش هيقدر يدفعها".
واختتم تصريحاته، قائلًا: "انتقالي للزمالك كان في مخاطرة كبيرة، بس كنت حاسس إني عايز أخوض التحدي وأعمل حاجه جديدة، بس حب جماهير الزمالك ليا من قبل ما انتقل ليه، كان دافع كبير ليا إني أروح الزمالك، ودا ساهم إني أشارك في بطولات كتير خدتها معاهم".
