كشفت النجمة غادة عبدالرازق عن مرورها بفترة تشعر خلالها بتغير واضح في طريقة تعاملها مع مشاعرها، موضحة أنها أصبحت أكثر تأثراً بالكلمات والمواقف خاصة في الفترة الأخيرة كاشفة عن المعاناة النفسية التي تشعر بها تلك الفترة وضغوط نفسيه جعلتها أقل قدرة على التحكم في انفعالاتها وهو ما دفعها إلى إعادة حساباتها في التعامل مع الآخرين خلال الفترة الأخيرة.
غادة عبدالرازق تكشف لأول مرة أسرار شخصية
وقالت«غادة» خلال لقائها مع الإعلامي الإماراتي أنس بوخش في برنامج «ABtalks»: «أنا حساسة جداً في الكلام، فممكن بسرعة تبقى دمعتي قريبة، وبقالي فترة حاسة إن أنا بقيت حساسة قوي زيادة عن اللزوم، ما كنتش كده، دمعتي ما كانتش قريبة قوي كده، كنت بعرف أعمل كنترول على مشاعري أو قدام الناس على الأقل».
وأضافت: «بقى لي فترة حاسة إن أنا مش عارفة أعمل الكنترول ده، مجرد إنك سألتني عاملة إيه الأيام دي، حسيت إن أنا عايزة أعيط، عايزة أشتكيلك، عيانة وتعبانة وزهقانة، ويمكن شوية حاجات كده، الدنيا على طول مش حلوة، يعني شوية كده وشوية».
وعن المشاعر التي تسيطر عليها في الوقت الحالي قالت: «هتلاقي حساسية زيادة عن اللزوم، توتر زيادة عن اللزوم، خوف مهول، تفكير كتير متواصل، مش عارفة أوقفه، عدم استمتاع باللحظة، وحاجات كنت متخيلة إنك لما تكبر في السن هتتشال من عليك، هتبقى أهدى وهتبقى ألطف، طلع العكس، طلع إنك كل ما بتكبر اللي أنت متخيل إنه هيبقى وراك وهيتشال من عليك، العكس بيزيد».
غادة عبد الرازق تتجنب أي نقاش مع اي شخص
وكشفت عن تأثير حالتها على طريقة تعاملها مع الآخرين قائلة: «أنا دلوقتي ممكن أكون بتكلم مع حد وفجأة وأنا بتكلم معاه أحس إن أنا صعبت عليا نفسي، مش فاهمة ليه، فألاقي نفسي بدل ما أتكلم من منطلق قوة، بقيت فجأة بتكلم من منطلق ضعف، وده بقى يضايقني، بالذات لما أكون حاسة إن أنا بتكلم في حاجة حقي، مش بفترى فيها مثلًا أو حاجة، من حقي».
وأوضحت: «فبقى لي فترة كده واخدة جنب، بقول ما تحاوليش تتكلمي في حاجة الأيام دي، أنتِ الأيام دي حساسة زيادة عن اللزوم، فبلاش تقعدي مع ناس كتير، بلاش تفتحي مواضيع».
وتحدثت غادة عبدالرازق عن محاولتها الحفاظ على حالة من الرضا والاطمئنان رغم الضغوط قائلة: «أنا كل الحاجات دي موجودة عندي، بس ساعات غصب عني، لأني أنا بني آدمة بشر، ساعات الحتة دي بتهرب مني»، مؤكدة أن الإنسان مهما حاول السيطرة على مشاعره قد يمر بلحظات يفقد فيها قدرته على التماسك.
