قال الإعلامي أحمد شوبير، إن هناك حالة من الجدل الكبير خلال الساعات الماضية بسبب إمام عاشور والعرض التركي المقدم له، مضيفًا: "مهو كل يوم لازم يبقى إمام نجم الشباك، نادي كونيا سبور التركي رفع عرضه لـ 4 مليون و250 الف دولار لضم إمام، وأنا قلت لكم أيه في موضوع إمام من البداية قلت بدأوا بـ 3 مليون دولار وهيوصلوا لـ5 مليون".
وأضاف "شوبير" في تصريحاته الإذاعية، اليوم الثلاثاء: "الأهلي قال إنه لم يتلق أي عرض مالي لضم إمام عاشور من كونيا سبور، لكن علي جامبوز عضو مجلس إدارة نادي كونيا سبور انتقد الأمر، وأكد تقديم عرضًا لضم لاعب الأهلي إمام عاشور، وأنه تم رفع قيمة العرض إلى 4 مليون دولار و250 ألفًا".
وتابع: أن عضو مجلس إدارة كونيا سبور التركي قال إن نفي الأهلي لعرضنا الأخير لضم عاشور غريب وعايزين نضمه بالفعل وهنعمله احتفال أفضل من اللي اتعمل لمحمد صلاح، ونحن نتابع أخبار إمام عاشور في معسكر الأهلي في إسبانيا نعرف جيدًا أنه يرفض الانتقال إلى الخليج".
وأوضح: "الأهلي بيقول حاجة والنادي التركي حاجة ثانية، والخلاصة أن الأهلي لن يترك اي لاعب من الخماسي: إمام عاشور ومصطفى شوبير ومحمد هاني ومروان عطية وياسر إبراهيم، إلا لو المقابل المادي لا يرفض، يعني أنا أعرف لاعب اتطلب فيه 30 مليون دولار، فالأهلي موقفه واضح جدًا لن يترك لاعب هذا الموسم إلا لو جبت لي عرض لا يرفض، وفيه لاعبين آخرين جات لها عروض على فكرة غير الخمسة دول".
وأكمل: "خلي بالك إمام نجم شباك ومسجل هدفين في كأس العالم وبيعيش أحلى فترات نجوميته لا شك في كده، وهو عارف قد أيه إن جماهير الأهلي زعلت منه لما رفض السفر الموسم الماضي مع الفريق إلى تنزانيا".
وأكد "شوبير": "إمام عاشور حاليًا مفيش قدامه غير إنه يشد حيله ويتدرب جيدا والاحتراف ده رزق بعد كده أنت وبختك، ومش معنى إن الأهلي قال لك لأ إن النادي واقف ضدك ما فيه لاعيبه احترفت والدنيا لم تضحك لها ومش كل الناس هتبقى زي محمد صلاح".
واختتم شوبير: "عندك مثلا محمد عبدالمنعم فيه حد يختلف عليه، احترف وقضى الموسم كله على الدكة، وفي كأس العالم تعرض للإصابة في مباراة إيران فخلاص ربنا مش كاتبها لك ودي أرزاق، ولو ربنا كاتب لك حاجة هتشوفها، وإمام قبل المعسكر برضه كان فيه كلام إنه مش راضي يتدرب وإمام مش راضي يسافر وكله كلام مش صحيح".
